Saturday, May 15, 2010

ՍԻՐԵԼԻ ՀԱՅՐԵՆԱԿԻՑՆԵՐ


Այս տարի լրանում է Վանի 1915 թվականի Հերոսամարտի 95-ամյակը։

Շնորհիվ այդ ինքնապաշտպանական կռիվների թուրքական յաթաղանից փրկվեց շուրջ 200000 հայ, որոնց մեծ մասը գաղթեց և հանգրվանեց Հայաստանի այժմյան տարածքում, ինչը կարևոր նշանակություն ունեցավ ոչ միայն հայկական գենոֆոնդի պահպանման, այլև որոշիչ դեր խաղաց Հայաստանի պետականության կայացման համար։ Հայոց պատմության ընթացքում Վանի Հերոսամարտը այն բացառիկներից էր, երբ ողջ ժողովուրդը միակամ էր, ինքնապաշտպանության ընթացքում Վանում առկա է կուսակցական համերաշխություն։ Քաղաքի ողջ բնակչության միասնական պայքարը, ղեկավարում էրն Արմենակ Եկարյանն ու Արամ Մանուկյանը և արդունքում արձանագրվեց փայլուն հաղթանակ։

Այսօր Վասպուրական պատմական աշխարհից գաղթած, Եղեռնը վերապրած վասպուրականցիների սերունդները միավորված են «Վասպուրական» հայրենակցական միության մեջ և, ի թիվս այլ միջոցառումների, մայիսի 23-ին ժամը 12.00-ին «Արծիվ Վասպուրականի» հուշարձանի մոտ (Աշտարակից Գյումրի տանող ճանապարհին) նշվելու է Վանի Հերոսամարտի տարեդարձը։

Վասպուրականցիների բոլոր ժառանգներին հրավիրում ենք մասնակցելու Վանի Հերոսամարտին նվիրված հանդիսությանը։

Մանրամասնությունների համար կարող եք զանգահարել 529583 և 094890690 հեռախոսահամարներով։

«ՎԱՍՊՈՒՐԱԿԱՆ» ՀԱՅՐԵՆԱԿՑԱԿԱՆ

ՄԻՈՒԹՅԱՆ ՎԱՐՉՈՒԹՅՈՒՆ

Saturday, April 17, 2010

«Վանը կորցրել ենք, սակայն Վանի մշակույթը չենք կորցնի...»


2010թ. ապրիլի 17-ին «Վասպուրական» հայրենակցական միությունը Հ. Շարամբեյանի անվան ժողովրդական արվեստի թանգարանում կազմակերպել էր միջոցառում նվիրված Վասպուրական աշխարհի անկրկնելի մշակույթին:

Միջոցառումը բացվեց «Վասպուրական» ՀՄ-ի նախագահ` Գագիկ Բաղդասարյանի խոսքով, ով մանրամասն խոսեց Վասպուրականի մշակութային ժառանգության պահպանման գործում միության դերի և նշանակության մասին, ապա ներկայացրեց մայիսի 23-ին «Արծիվ Վասպուրական» հուշարձանի շրջակայքում կայանալիք դաշտահանդեսի մանրամասները:

Զեկույցով հանդես եկավ ազգագրգետ, պատմ. գիտ. դոկտոր Հարություն Մարությանը: Իր զեկույցում պրն. Մարությանը ներկայացրեց Վասպուրական գավառի մշակույթի առանձնահատկությունները և այդ ոլորտում մեր նախնյաց անկրկնելի ձեռքբերումները:

Զեկույցից հետո ցուցադրվեց «Շողակաթ» Հեռուստաընկերության պատրաստած «Հրաշք Վանիկը» ֆիլմը, որը պատմում է վանեցու զավակ, հայ մշակույթի նվիրյալ Հովհաննես Շարամբեյանի գործունեության մասին:

Միությունը որոշեց ցուցադրել այս ֆիլմը, քանզի Շարամբեյանը իր հասարակական գործունեության մեծ մասը ուղղել էր հենց Վասպուրականի մշակույթի պահպանությանը:


Միջոցառումը կրում էր «Վանը կորցրել ենք, սակայն Վանի մշակույթը չենք կորցնի...» խորագիրը, որն եղել է Շարամբեյանի կյանքի խոսքը և գործը:


Միջոցառմանը ներկա էին ավելի քան 60 վասպուրականցիներ:


Միության Վարչություն


Thursday, April 8, 2010

ԱՅՑԵԼՈՒԹՅՈՒՆ ԽՐԻՄՅԱՆ ՀԱՅՐԻԿԻ ՇԻՐԻՄԻՆ


Այս տարի լրանում է Խրիմյան Հայրիկի մահվան 190րդ տարելիցը և այդ կապակցությամբ ապրիլի 3-ին «Վասպուրական» հայրենակցական միության վարչության անդամները միության նախագահ Գագիկ Բաղդասարյանի ուղեկցությամբ այցելեցին Մայր Աթոռ Սբ. Էջմիածին` հարգանքի տուրք մատուցելու Մկրտիչ Վանեցու շիրիմին: Վարչության անդամները, միության բարեկամները և համխոհները ծաղիկներով զարդարեցին մեծ հայորդու գերեզմանը ապա, ի հիշատակ Խրիմյան Հայրիկի, մայրավանքում աղոթք բարձրացնելուց հետո վերադարձան Երևան:

Հավերժ Փառք մեծացն մերոց...

Tuesday, April 6, 2010

ԴԱՇՏԱՀԱՆԴԵՍ ՆՎԻՐՎԱԾ ՎԱՆԻ ԻՆՔՆԱՊԱՇՏՊԱՆՈՒԹՅԱՆ 95-ԱՄՅԱԿԻՆ


Վասպուրական հայրենակցական միությունը Հայաստանի ամենահին հայրենակցական միությունն է: Դեռ տասնամյակներ առաջ Արծիվ Վասպուրականի հուշարձանի բացումն առիթ հանդիսացավ, որպեսզի համախմբվեն Խորհրդային Հայաստանում ապրող վասպուրականցիներն և վանեցիները:
Վասպուրական հայրենակցական միության անդամները հպարտությամբ են հիշում Վանի ինքնապաշտպանության 27 օրը և այս տարի ևս մշակութային միջոցառումներից բացի մեծ շուքով կտոնեն ինքապաշտպանության 95-ամյակը:
“Այս տարի ծրագրել ենք նշել հայոց առաջին մայրաքաղաքի հիմնադրման 2865-ամյակը, որը հաշվում ենք Վանի հիմնադրման օրվանից: Նախատեսվում է նաև այցելություն Վան, որի ընթացքում խնդիր կդրվի ծանոթանալ նյութական արժեքներին և Վանից բերել առնվազն գեղեցիկ հուշեր: Մայիսի 23-ին Աշտարակից Գյումրի տանող ճանապարհին գտնվող Արծիվ Վասպուրականի հուշարձանի մոտ նախատեսվում է մեծ դաշտահանդես` նվիրված Վանի ինքնապաշտպանության 95 ամյակին: Երևանի պատմության թանգարանում աշնանը կանցկացվի ցուցահանդես, որտեղ Վանից բերված աշխատանքների միջոցով կներկայացվի վանեցու կենցաղը”, ասաց միության վարչության նախագահ Գագիկ Բաղդասարյանը:
“Դաշտահանդեսի կազմակերպման համար այս տարի համագործակցում ենք նաև Արմենական կուսակցության հետ, քանի որ Վանի ինքնապաշտպանությունը ղեկավարում էր Արմենական կուսակցությունից Արմենակ Եկարյանը: Վանի ինքնապաշտպանությունն այն քիչ դեպքերից է, երբ կուսակցականները վայր դրեցին կուսակցական պատկանելությունը և միացան ինքնապաշտպանությանը: Երբ հաղթանակն արդեն իսկ իրողություն էր և Վանի ղեկավարն էր դառնալու Դաշնակցականը, կրկին տարաձայնություներ չեղան: Հիմա էլ Արմենականների մասնակցությամբ կազմակերպում ենք այդ միջոցառումը, որին ներկա կլինեն նաև մյուս կուսակցությունների ներկայացուցիչները: Դա էլ է խորհդանշական, քանի որ միասնականություն կա և մոռանում ենք կուսակցական պատկանելությունը”, հավելեց Գագիկ Բաղդասարյանը:

Արմենուհի Կարեյան


Tuesday, March 9, 2010

ՏՈՆԱԿԱՆ ՄԻՋՈՑԱՌՈՒՄ




Մարտի 7-ին «Կանանց Միջազգային տոնի» առիթով «Վասպուրական» հայրենակցական միության վարչությունը Երևանի Մանկապատանեկան թատրոնի /Պիոներ պալատ/ դահլիճում կազմակերպել էր տոնական միջոցառում։

Միության նախագահ Գագիկ Բաղդասարյանը վարչության անունից ջերմորեն շնորհավորելով վասպուրականցի կանանց, նշեց նրանց մայրերի ու քույրերի անգնահատելի ու հերոսական դերը Վանի պաշտպանության օրերի ժամանակ, ինչպես նաև նշեց վասպուրականցի կանանց աշխատասիրությունը, համբերությունն ու հպարտությունը, նրանց անձնվեր դերն ընտանիքում և անմնացորդ նվիրվածությունը երեխաներին։ Շնորհավորելով կանանց տոնի կապակցությամբ մաղթեց նրանց անսահման երջանկություն, առողջություն և նոր ձեռքբերումներ։

Գագիկ Բաղդասարյանը ներկայացրեց «Վասպուրական» հայրենակցական միության վարչության որոշումը՝ միության հնագույն անդամ, վաստակաշատ լրագրող, բազմաթիվ գրքերի և հոդվածների հեղինակ, միության փոխնախագահ Նոռա Մելիքյանին, միության հիմնադրման օրվանից, միության գործունեության ընթացքում ամենաակտիվ անդամներից մեկին՝ վարչության քարտուղար Լաուրա Հովսեփյանին և «Վասպուրական» ժողովրդական երգի, պարի համույթի հիմնադիր տնօրեն Անահիտ Խեչումյանին շնորհակալագրերով և կրծքանշաններով պարգևատրելու մասին։

Վարչության որոշմամբ միության պատվավոր անդամի կոչում շնորհվեց Ազգային ակադեմիայի պատմության ինստիտուտի բաժնի վարիչ, պատմական գիտությունների դոկտոր-պրոֆեսոր Էմմա Կոստանդյանին։

Տոնական օրվա կապակցությամբ վարչության կողմից պարգևատրվեց նաև «Վասպուրական» հայրենակցական միության անդամ, Երևանի մանկապատանեկան կենտրոնի տնօրեն Լաուրա Ավետիսյանը։

Հանդիսավոր նիստի ժամանակ «Վասպուրական» հայրենակցական միության անդամի տոմսեր և կրծքանշաններ հանձնվեցին մի խումբ երիտասարդ աղջիկների, որոնք հենց այդ օրն անդամակցեցին միությանը։

Տոնի առիթով միության կանանց շնորհավորեց և Երևանի քաղաքապետ Գագիկ Բեգլարյանի շնորհավորական ուղերձը ներկայացրեց քաղաքապետարանի մշակույթի վարչության պետ Էլեոնորա Թումանյանը։

Ներկաներին ողջունեց և նորանոր հաջողություններ մաղթեց Մանկապատանեկան կենտրոնի տնօրեն Լաուրա Ավետիսյանը։

Հանդիսավոր նիստի ավարտին հարյուրավոր վասպուրականցի կանանց երգ ու պարով ողջունեցին Մանկապատանեկան կենտրոնի, ինչպես նաև «Վասպուրական» համույթի սաները։


«ՎԱՍՊՈՒՐԱԿԱՆ» ՀԱՅՐԵՆԱԿՑԱԿԱՆ

ՄԻՈՒԹՅԱՆ ԼՐԱՏՎԱԿԱՆ ԿԵՆՏՐՈՆ

Wednesday, March 3, 2010

ՀԱՆԴԻՊՈՒՄ ԱՐՄԵՆԱԿԱՆ-ՌԱԿ ԳՐԱՍԵՆՅԱԿՈՒՄ

Մարտի 3-ին Արմենական-ՌԱԿ գրասենյակում տեղի ունեցավ կուսակցության ատենապետ Հակոբ Ավետիքյանի, փոխատենապետ Արմեն Մանվելյանի, վարչության անդամներ՝ Սուրեն Սարգսյանի, Գայանե Մուրադյանի և «Վասպուրական» հայրենակցական միության նախագահ Գագիկ Բաղդասարյանի, վարչության անդամներ՝ Դավիթ Զադոյանի և Ռոբերտ Միրզոյանի հանդիպումը, որի ժամանակ քննարկվեց Վանի ազատամարտի 95-ամյակին նվիրված տոնակատարության համատեղ նախապատրաստման և անցկացման մի քանի հարցեր։ Հանդիպման մասնակիցները ներկայացրեցին 2010 թվականի իրենց ծրագրերը և փոխադարձ հետաքրքրություն ներկայացնող մի շարք հարցեր։

Թե՛ Արմենական ՀՈԱ կուսակցության ղեկավարները, և թե՛ «Վասպուրական» հայրենակցական միության ներկայացուցիչները հույս հայտնեցին, որ կուսակցության և հայրենակցական միության բազմաբնույթ համագործակցությունը կլինի մշտապես, հատկապես մշակութային միջոցառումների ժամանակ։

ՄԻՈՒԹՅԱՆ ՎԱՐՉՈՒԹՅՈՒՆ

Wednesday, February 10, 2010

Շ Ն Ո Ր Հ Ա Ն Դ Ե Ս


Երևանի Ավ. Իսահակյանի անվան գրադարանի դահլիճում փետրվարի 5-ին տեղի ունեցավ վերջերս նկարահանված «Վասպուրական» ժողովրդական երգի, պարի մանկական թատրոնի երկու նոր տեսահոլովակների շնորհանդեսը։

Իրենց անցած ուղու մասին պատմեց մանկական թատրոնի հիմնադիր և գեղարվեստական ղեկավար Անահիտ Խեչումյանը։

Ելույթներով հանդես եկան և կոլեկտիվին նորանոր հաջողություններ մաղթեցին հանրահայտ լրագրող Վրեժ Սարուխանյանը, Հայաստանի գրական ֆոնդի նախագահ Արևշատ Ավագյանը, Իսահակյանի անվան գրադարանի տնօրեն Հասմիկ Կարապետյանը։ «Վասպուրական» հայրենակցական միության անունից, նկարահանված տեսահոլովակները և համույթի գործունեությունը բարձր գնահատեց միության վարչության նախագահ Գագիկ Բաղդասարյանը։ Նշելով համույթի հիմնադիր ղեկավար Անահիտ Խեչումյանի անուրանալի և անմնացորդ ներդրումը մանկական երգի-պարի թատրոնի կայացման և հաջողությունների հասնելու գործում, ինչպես նաև Արթուր Բադալյանի կողմից նկարահանած տեսահոլովակների պրոֆեսիոնալ որակը նա հույս հայտնեց, որ համույթը դեռ երկար ճանապարհ ունի անցնելու, իր հիացմունքի արժանի արվեստը ներկայացնելու տարբեր բերամահարթակներում և նվաճելու նորանոր բարձրւնքներ։ Այսօրվա տեսահոլովակները սկիզբ դրեցին այն տասնյակ տեսահոլովակների, որոնք դեռևս կնկարահանվեն և իրենց արժանի գնահատականը կստանան։ Միևնույն ժամանակ Գագիկ Բաղդասարյանը հույս հայտնեց, որ համույթը առաջիկայում ավելի սերտ կհամագործակցի «Վասպուրական» հայրենակցական միության հետ և իր մասնակցությունը կունենա միության կողմից կազմակերպվող մշակութային միջոցառումներին։


Միության վարչություն

Friday, December 25, 2009


Հ Ա Ր Գ Ե Լ Ի

Հ Ա Յ Ր Ե Ն Ա Կ Ի Ց Ն Ե Ր


2010 թվականին լրանում է Վանի հերոսամարտի 95-ամյակը։

Մենք խոնարհվում ենք մեր նախնիների հիշատակի առաջ, ովքեր հերոսաբար կռվեցին ու զոհվեցին հանուն հաղթանակի, հաղթանակ՝ որի արդյունքում հազարավոր հայորդիներ փրկվեցին յաթաղանից և այսօր նրանց ժառանգներն ապրում են անկախ Հայաստանում և աշխարհի տարբեր ծայրերում։

Թող 2010 թվականը դառնա Հայաստանում ապրող վասպուրականցիների և նրանց ժառանգների կյանքի ուրախ պահերի, լավ հիշողությունների, առողջության և երջանկության, ձեռքբերումների և հաջողությունների տարի։

Շնորհավորում եմ նաև աշխարհասփյուռ վասպուրականցիների Ամանորն ու Սուրբ Ծնունդը՝ մաղթելով բարեկեցություն, անհոգ, երջանիկ կյանք, հույս, հավատ և սեր։



«ՎԱՍՊՈՒՐԱԿԱՆ» ՀԱՅՐԵՆԱԿՑԱԿԱՆ

ՄԻՈՒԹՅԱՆ ՎԱՐՉՈՒԹՅԱՆ ՆԱԽԱԳԱՀ

Գ. ԲԱՂԴԱՍԱՐՅԱՆ


Friday, December 11, 2009

ԱՐՏԱԳՆԱ ՆԻՍՏ ԺՈՒՌՆԱԼԻՍՏՆԵՐԻ ՏԱՆԸ

Այս տարվա նոյեմբերի 12-ին Հայաստանի Ժուռնալիստների տանը տեղի ունեցավ «Վասպուրական» հայրենակցական միության վարչության արտագնա նիստ, որին վարչության անդամներից բացի մասնակցում էին և ելույթներ ունեցան վարչությանը կից ավագների խորհրդի անդամները։ Վարչության վերջին երկու ամսում կատարած աշխատանքների մասին հաշվետվությամբ հանդես եկավ միության վարչության նախագահ Գագիկ Բաղդասարյանը։ Ներկայացնելով կատարված աշխատանքները նա միևնույն ժամանակ նշեց այն կարևոր խնդիրները, որոնք առաջիկայում համատեղ ուժերով անհրաժեշտ է լուծել։ Գործնական առաջարկություններով հանդես եկան Դավիթ Զադոյանը, Նոռա Մելիքյանը, Ռոբերտ Միրզոյանը, Ժիրայր Ասլանյանը

և ուրիշներ։

Նիստի մասնակիցները կարևորելով միության շարքերում վասպուրականցիների երիտասարդ ժառանգների համալրման խնդիրը, մեկ անգամ ևս նշեցին, որ վարչության հիմնական խնդիրը եղել և մնում է վասպուրականցիների և նրանց ժառանգների միավորումը, պատմական հայրենիքից անբաժան լինելու զգացողության սերմանումը, Վանի հերոսամարտի մասնակիցների, ինչպես նաև նշանավոր վասպուրականցիների կյանքն ու գործունեությունը լուսաբանելն ու ժողովրդականացնելը։

Նիստի վերջում մասնակիցներին բաժանվեցին Վասպուրականի դրոշի և զինանշանի պատկերով կրծքանշաններ։ Որոշվեց այսուհետ «Վասպուրական» հայրենակցական միության շարքերը համալրող յուրաքանչյուր անդամի տրամադրել նույնանման կրծքանշաններ։


Միության վարչություն


ՀԱՅԱՍՏԱՆԻ ԱԶԳԱՅԻՆ ԳՐԱԴԱՐԱՆՈՒՄ ՆՇՎԵՑ Վ. ՀԱՐՈՒԹՅՈՒՆՅԱՆԻ 100-ԱՄՅԱԿԸ


Ականավոր գիտնական, մանկավարժ ու ճարտարապետ, «Վասպուրական» հայրենակցական միության հիմնադիր-նախագահ Վարազդատ Հարությունյանի 100-ամյա հոբելյանը Հայաստանի ազգային գրադարանում նշվեց ցուցահանդեսով, գրքի և ֆիլմի շնորհանդեսով։

Կարևորելով Վարազդատ Հարությունյանի վաստակն ու թողած ժառանգությունը՝ Ազգային գրադարանի տնօրեն Դավիթ Սարգսյանը նշեց, որ նրա գրչին են պատկանում հայկական ճարտարապետությանը վերաբերվող բազմաթիվ գիտական աշխատություններ ու դասագրքեր։ «Հայտնի վանեցին ոչ միայն գիտության առաջատար նվիրյալներից էր, այլև որպես մարդ մեծ դեր ու կարևորություն ունեցավ մեր պատմության մեջ՝ իր թողած մանկավարժական ու հասարակական գործունեությամբ»,-ասաց նա։

ՀՀ ճարտարապետների միության նախագահ Մկրտիչ Մինասյանն արժևորեց ակադեմիկոսի դերը ճարտարապետության բնագավառում։ Ելույթներ ունեցան նաև ակադեմիկոս Բաբկեն Հարությունյանը, Վ. Հարությունյանի որդին՝ Ռաֆայել Հարությունյանը։

Ցուցահանդեսում Վ. Հարությունյանը ներկայացված էր իր հեղինակած և իրեն նկարագրող գրքերով, մամուլում տեղ գտած հոդվածներով ու ակնարկներով։ Ցուցադրվեց նաև «Վաստակ և գնահատանք» գիրքը Վ. Հարությունյանի մասին, ինչպես նաև ներկայացվեց Հանրային հեռուստատեսության կողմից պատրաստված «Հայը» ֆիլմը։

Վ. Հարությունյանը ծնվել է Վանում 1909 թվականին։ Հիշելով իր մանկությունը՝ նա ասել է. «հիշում եմ իմ հայրենի Վանը, մեր տունը, իմ հարազատներին, մեր այգին, հիշում եմ Վանի հերոսամարտը, որը հաղթանակով ավարտվեց, բայց անկախ մեր կամքից, ստիպված եղանք գաղթել»։

1981թ. նա Հայաստանոում հիմնել է «Վասպուրական» հայրենակցական միությունը։ Վ. Հարությունյանը Հայրենիք-Սփյուռք մշակութային կապերի նախագահության անդամ էր, Արտասահմանյան երկրների հետ մշակութային կապերի ընկերակցության, «Գիտելիք» ընկերության նախագահության անդամ, ղեկավարել հուշարձանների պահպանության հայկական ընկերակցությունը, 1956-ից նաև Մայր Աթոռ Ս. Էջմիածնի ճարտարապետական հանձնաժողովի նախագահն էր։ Բազմաթիվ շքանշանների ասպետ է, Երևանի պատվավոր քաղաքացի։

Վարազդատ Հարությունյանը հեղինակ է 800-ից ավելի գիտական հոդվածների, 3 դասագրքերի, հայկական ճարտարապետության մասին 40 գրքերի, ինչպես նաև հուշագրությունների 3 հատորի։ 50 տարի ղեկավարել է Պոլիտեխնիկական ինստիտուտի ճարտարապետության ամբիոնը, շուրջ 12 տարի՝ Հայաստանի ճարտարապետների միությունը։ Մահացել է 2008 թվականի մարտին Երևանում։


ՄԻՈՒԹՅԱՆ ՎԱՐՉՈՒԹՅՈՒՆ

25.11.2009թ.


Վ. ՀԱՐՈՒԹՅՈՒՆՅԱՆԻ 100-ԱՄՅԱ ՀՈԲԵԼՅԱՆԻ ԿԱՊԱԿՑՈՒԹՅԱՄԲ ԿԱՏԱՐՎԵՑ ՀՈԳԵՀԱՆԳՍՏԻ ԱՐԱՐՈՂՈՒԹՅՈՒՆ և ԱՆՑԿԱՑՎԵՑ ԿԱՌԱՎԱՐԱԿԱՆ ՀԱՆԴԻՍԱՎՈՐ ՆԻՍՏ


«Վասպուրական» հայրենակցական միության հիմնադիր-նախագահ Վարազդատ Հարությունյանի 100-ամյա հոբելյանի կապակցությամբ նոյեմբերի 28-ին Մայր Աթոռ Սուրբ Էջմիածնում Ամենայն Հայոց կաթողիկոս Ն.Ս.Օ.Տ.Տ. Գարեգին Երկրորդի հանդիսապետությամբ կատարվեց հոգեհանգստի արարողություն։

Նույն օրը Հայաստանի ճարտարապետների միությունում ի հիշատակ Վ. Հարությունյանի ճարտարապետի ու գիտնականի, անցկացվեց կառավարական հանդիսավոր նիստ, որին մասնակցում էին կառավարության անդամներ, հասարակական-քաղաքական, մշակութային գործիչներ և գիտնականներ։ Հնչած ելույթներում արժևորվեցին Վարազդատ Հարությունյանի վաստակն ու դերը հայ ճարտարապետության, գիտության և մանկավարժության բնագավառներում։


ՄԻՈՒԹՅԱՆ ՎԱՐՉՈՒԹՅՈՒՆ


ՄԻՈՒԹՅՈՒՆԸ ՀԱՄԱԼՐՎՈՒՄ Է ԵՐԻՏԱՍԱՐԴ ԱՆԴԱՄՆԵՐՈՎ

Ամանորի նախորյակին «Վասպուրական» հայրենակցական միությանը անդամակցելու դիմում են ներկայացրել 40 երիտասարդ մտավորականներ, ուսանողներ, գիտության, կրթության և մշակույթի բնագավառների աշխատողներ, որոնք բոլորն էլ վասպուրականցիների ժառանգներ են և ինչպես միության հնաբնակ անդամները, իրենց հիմնական խնդիրը համարում են վասպուրականցիների ժառանգների միավորումը, պատմական հայրենիքից անբաժան լինելու զգացողությունն ու նրան հավատարիմ մնալու գաղափարը։


ՄԻՈՒԹՅԱՆ ՎԱՐՉՈՒԹՅՈՒՆ

Ք. Երևան

10.12.2009թ.

Sunday, October 25, 2009

ՀԱՆԴԻՊՈՒՄ ՆՈՐԱԲԱՑ ՏՈՒՆ–ԹԱՆԳԱՐԱՆՈՒՄ


Սիլվա Կապուտիկյանի 90-ամյակի առիթով հոկտեմբերի 22-ին «Վասպուրական» հայրենակցական միության մի խումբ անդամներ այցելեցին իրենց հայրենակից, Ամենայն Հայոց բանաստեղծուհի Սիլվա Կապուտիկյանի տուն–թանգարան, որտեղ իր կյանքի վերջին 30 տարիներին ապրել ու ստեղծագործել է մեծ բանաստեղծուհին։ Տուն–թանգարանի տնօրեն, Սիլվա Կապուտիկյանի զարմուհի Ռաֆլետա Հաջյանը հյուրերին ներկայացրեց թանգարանում ցուցադրվող նյութեր և առարկաներ, պատմեց տուն–թանգարանի ստեղծման, բանաստեղծուհու ստեղծագործական ուղու մասին։ Ուշագրավ հիշողություններ պատմեցին նաև հյուրերը՝ Ռոբերտ Միրզոյանը, Սամվել Բեգլարյանը, Ժիրայր Ասլանյանը, Ռաֆայել Հարությունյանը։ «Վասպուրական» հայրենակցական միության նախագահ Գագիկ Բաղդասարյանը բոլոր վասպուրականցիների անունից շնորհակալություն հայտնեց տիկին Ռաֆլետային տուն–թանգարանի ստեղծման գործում իր անգնահատելի դերի համար և նշեց, որ վասպուրականցիները հպարտ են, որ իրենց վաղնջական հայրենիքը հայ ազգին մշտապես նվիրել է նշանավոր շատ մեծերի, այդ թվում Ամենայն Հայոց բանաստեղծուհի, գրող, հրապարակախոս, իր ազգի հոգսերով ապրած, մեծատաղանդ, Երևանում ծնված, բայց իրեն վանեցի համարող Սիլվա Կապուտիկյանին, որը ոչ միայն տասնյակ բանաստեղծություններ է նվիրել Վասպուրական աշխարհին, այլ նաև գրել Վանին նվիրված օրհներգը։ Մի հատված Սիլվա Կապուտիկյանի Վանին նվիրված օրհներգից.

Վասպուրական մեր թանկ աշխարհ,

Մեր Սիփան սար, մեր Ախթամար,

Մեր նախնեաց Բերդ արծուասոյր,

Մի ձեռքիդ՝ բահ, մի ձեռքիդ՝ սուր։

Երազական մեր Վան քաղաք,

Մեր կարօտի աղբիւր ու ակ,

Ալիք կու տաս սրտիս միջով,

Ով ասի՝ լիճ, ես կասեմ՝ ձուկ։

Դլե եաման, դլե եաման,

Վերեւում՝ դրախտ, ներքեւում՝ Վան։

Գագիկ Բաղդասարյանը թանգարանին նվիրեց Սիլվա Կապուտիկյանի կողմից անձամբ իրեն տրամադրված Երևանի մասին «Երևան» գրքի համար գրված հոդվածի բնօրինակը, որն իր արժանի տեղը կգտնի թանգարանում։ Թանգարանին նվիրվեց նաև Գագիկ Բաղդասարյանի հեղինակած «Երևան» գիրք–ալբոմը։ Թանգարանի տնօրենն իր հերթին շնորհակալություն հայտնեց այցելության համար և Վասպուրականցիներին նվիրեց բանաստեղծուհու 90-ամյակի կապակցությամբ վերջերս լույս տեսած «90 երգ» ժողովածուն և առաջարկեց առաջիկայում հանրահայտ վասպուրականցիների հավաք կազմակերպել Սիլվա Կապուտիկյանի տուն–թանգարանում։ Վերջում ցուցադրվեց մեծ բանաստեղծուհու 90-ամյակին նվիրված վավերագրական ֆիլմ։

Միության վարչություն

Tuesday, October 13, 2009

ՄԱՍՆԱՃՅՈՒՂ ՌՈՒՍԱՍՏԱՆԻ ԴԱՇՆՈՒԹՅԱՆ ՄԱՅՐԱՔԱՂԱՔՈՒՄ

Օրերս «Վասպուրական» հայրենակցական միության նախաձեռնությամբ Ռուսաստանի Դաշնության մայրաքաղաք Մոսկվայում բացվեց միության մասնաճյուղի գրասենյակ, որը գտնվում է Շկոլնայա փողոցի 24 շենքում։

Գրասենյակի բացման կապակցությամբ շնորհավորում ենք Մոսկվայաբնակ հայ համայնքին, առանձնապես վասպուրականցիներին և նրանց ժառանգներին։ Մեր համագործակցությունը կնպաստի հայապահպանման սուրբ գործին, Ռուսաստանի մայրաքաղաքի և Հայաստանի վասպուրականցիների ժառանգների կապերի ամրապնդմանը։

Միության վարչություն

Sunday, August 30, 2009

Երկրորդ հանդիպում գիտնականների հետ...

Ս. թ. օգոստոսի 29-ին, Երևան քաղաքի հիմնադրման Էրեբունի թանգարանում տեղի ունեցավ քննարկում, նվիրված Տուշպա-Վան քաղաքի հիմնադրման և մայրաքաղաք հռչակման տարեթվի ճշտմանը։ Քննարկմանը մասնակցում էին ԵՊՀ հայոց պատմության ամբիոնի վարիչ, պատմ. գիտ. դոկտոր-պրոֆեսոր, ՀՀ ԳԱԱ թղթակից-անդամ Բաբկեն Հարությունյանը, նույն ամբիոնի դոցենտ, ՀՀ ԳԱԱ արևելագիտության ինստիտուտի ավագ գիտաշխատող, պատմ. գիտ. թեկն. Արտակ Մովսիսյանը, Երևանի մանկավարժական համալսարանի դասախոս, պատմ. գիտ. թեկն. Երվանդ Գրեկյանը, Էրբունի թանգարանի տնօրեն, պատմ. գիտ. դոկտոր Աշոտ Փիլիպոսյանը, ՀՀ ԳԱԱ հնագիտության և ազգագրության ինստիտուտի առաջատար գիտաշխատող, պատմ. գիտ. դոկտոր, «Վասպուրական» միության փոխնախագահ Հարություն Մարությանը, Միության վարչության անդամ Նարեկ Աշուղաթոյանը։

Մեր պատմության հնագույն շրջանի վերականգնման սկզբնաղբյուրները արքաների արձանագրություններն են։ Ուրարտուի-Վանի թագավորության արքաների արձանագրություններից հնագույնների թվում կան Տուշպա-Վանի կառուցման վեց նույնատիպ արձանագրություն, որոնք թվակիր չեն և պատկանում են Սարդուրի Առաջին արքային։ Դրանք փորագրված են Վանի ժայռի շուրջն առկա պարսպի մաս կազմող հսկայածավալ քարասալերին։ Սարդուրի արքայի մասին մեր տեղեկությունները հնարավորություն են տալիս նշելու նրա գահակալության վերջին թիվը՝ մ.թ.ա. 825, նրա գահակալության սկիզբը հստակ հայտնի չէ։ Մյուս կողմից, Ասորեստանի Սալմանասար Երրորդ արքայի մ.թ.ա. 856/855 թթ. թվագրվող արձանագրության մեջ հիշվում է «Տուրուշպա» քաղաքը, որը «Տուշպա» անվան մեզ հայտնի հնագույն տարբերակն է։ Ահա այս հիմամբ էլ 2010 թ. աշնանը առաջարկվում է նշել «Տուշպա-Վանի [առաջին] հիշատակության 2865 ամյակը», կամ ուղղակի առաջարկել հետևյալ կարգախոսային բնույթի ձևակերպումը՝ «Տուշպա-Վան --- 2865»։

Նկատենք, որ Տուշպա-Վանը եղել է ոչ միայն Վանի թագավորության (Ուրարտու), նրա անմիջական ժառանգորդ հանդիսացող Երվանդունիների հայկական պետության մայրաքաղաքը, այլ հետագայում ևս շարունակել է պահպանել հայկական կենտրոնի դերը։ Այսպես, մ.թ.ա. 6-րդ - 4-րդ դարերում այն եղել է Աքեմենյան պետության 13-րդ սատրապության (որն ընդգրկում էր Հայաստանի հարավային կեսը) վարչական կենտրոնը, 908-1021 թթ. եղել է Վասպուրականի թագավորության մայրաքաղաք, ուշ միջնադարում և 19-20-րդ դարի սկզբին՝ Արևմտյան Հայաստանի վաճառաշահ, արհեստավորական և մշակութային կենտրոնը, ամենահայաշատ քաղաքը: Պատահական չէ, որ Վանն Արևմտյան Հայաստանի միակ խոշոր քաղաքն էր, ուր 1915 թ. մղվող ինքնապաշտպանությունը պսակվեց հաղթանակով, իսկ Արամ Մանուկյանի, հետագայում և Կոստի Համբարձումյանի գլխավորությամբ Վանում ստեղծված հայկական իշխանությունը 20-րդ դարում մղած մեր ազատագրական պայքարի առաջին քաղաքական ձեռքբերումն էր:

Էրեբունի-Երևանի ամենամյա տոնակատարություններին զուգընթաց հայոց հերթական մայրաքաղաքներին նվիրված միջոցառումների անցկացումն ունի նախ և առաջ գիտա-ճանաչողական, գիտա-մշակութային նշանակություն։ Դրանք կնպաստեն հայոց մայրաքաղաքների, հետևաբար և հայոց պատմության հետաքրքիր դրվագների ավելի լայն լուսաբանմանը, հայոց ինքնության ամրապնդմանը, կխթանեն նորանոր ուսումնասիրությունների ի հայտ գալուն, իսկ ժամանակավոր ցուցահանդեսները, կատալոգները, որոշակի ուղղորդվածություն ունեցող մշակութային միջոցառումները կխթանեն տուրիզմի աճին։